الحب الصغير

اولا انا شاب عندي 17 سنه بحب بنت عندها 14 سنه بس شكلها اكيد يدي اكبر وهيا كمان حبتني وكلمنا بعض وصارحني بعض وهيا ساكنه قصادي واعرف اخوها وابوها كام مره كده كلمتها باباها بيرد عليا وقفل علطول فبادئ يشك فيها وبقيت اشوف فعنيه نظرات غريبة كده مش عارف اعمل ايه بجد انا عايز اعرف احسن حل مش عايز اظلم البنت دي معايا وانا بحبها بجد حب مش لعب خالص

دلوقتى عايزة اقولك انكم لسة صغيرين قوى يعنى فى مرحلة المراهقة وممكن المشاعر اللى جواكم دى تكون مراهقة وتنتهى فى أى وقت وممكن فعلا تكون حب حقيقى ولكن لو سلمنا أنها حب حقيقى هيحصل إيه هتفضلوا تكلموا بعض لمده 10 سنين مثلا لحد ما تكون خلصت دراستك واشتغلت وتقدر تخطبها

نصيحتى ليك وليها خلوا علاقتكم علاقة زمالة وجيره وبس لحد ما تكبروا شوية وتنضج مشاعركم وتعرفوا تحكموا عليها وكمان علشان ما تمشوش الطريق الغلط وترجعوا تندموا ولان اول الغلط وكلامكم من ورا اهلها ان والدها بقى بيشك فيها وممكن لو أستمر الشك تحصل مشاكل أكتر من كده

انتوا لسة صغيرين ووراكم دراسة ومستقبل أهتموا بيهم وخلوا علاقتكم مجرد جيرة وزمالة ومع الأيام ولما سنكم هيكبر شوية شوية وهتقدروا تحددوا مشاعركم وساعتها ممكن تاخد خطوة جادة ولكن دلوقتى ما أعتقدش أنه فيه اى شىء ممكن يحصل فبلاش تعمل لها ولنفسك مشاكل مفيش داعى ليها

انا في الاول كنت بحب وعارف ان ده شغل عيال ومراهقه وكده بس مع الانسانه ديه حبيتها بجد ومستعد اعمل اي شئ علشانها وانا دلوقتي في جامعه وكام سنه واتخرج وصعب كده تحولي مشاعر حب لمشاعر جيره هتبقي مستحيله مش هقدر اشوفها قدامي ومقولهاش كلمة بحبك صعب اوووي وموضوع الدراسه انا علي ما قد بقدر اخليها تركز في المذاكره اوووي وانا بجد حاسس ومتاكد انه مش شغل مراهقه بجد انا قربت انهار من التفكير ومش عارف اعمل ايه يا ريت لو في حل تاني او ليكي رائي تاني

هو فعلا ممكن تكون مشاعرك صادقة ولكن مش هتقدر تعمل اى خطوة جادة الا بعد كتييييييييييير فحرام تضيعوا بعض وتعملوا مشاكل لبعض انا مش بقولك حول مشاعرك ولكن على الاقل حاول تخلى علاقتك بيها جيرة وزمالة علشان على الاقل تتجنبوا المشاكل وخاصة هيا لان لو دخل الشك عند اهلها ممكن تحصل لها مشاكل كتيرة ولانك دلوقتى مش هتقدر تعمل اى خطوة جاده زى خطوبة مثلا وحتى لو انت تقدر مستحيل لانها لسة صغيرة على الاقل لما تكون دخلت الجامعة يعنى ياريت تحاول تخفف كلامك وعلاقتك بيها علشان المشاكل وما تتعبوش بعض وربنا يسهل ويوفقكم ويقدم اللى فيه الخير

أنا مقدر كلامك اوووي طيب هوه في حل جيه في دماغي هوه اخوها قدي في السن واعرفه ينفع اروح اقوله افهمه الموضوع كله ولا دي هبتقي مجازفة ملهاش لازمة ومكن بتقبل الموضوع ولا هتبقي صدمه ليه ممكن يفهم غلط؟؟؟

لا لا بلاش هتتفهم غلط اكييييييييد وممكن الموضوع يبوظ خالص ويحصل لها كمان مشاكل لا حصر لهاأصبر على الاقل لحد ماهيا تدخل الجامعة ولو كنت قادر حتى على خطوبة اتقدم لها

انا هحاول اقلل اتصالتي بيها عادي خالص لاغيه ما هيا تدخل جامعه واقدم المشيئه واطلب ايدها عشان بجد انا حاسس اني دي هتبقي حياتيبس ليا سؤال بسيط
هوه لو انا قللت علاقتي بيها مش ممكن الحب الي ما بينا يقل مع العلم انها بتاخد دروس وبتقابل ناس كتير ولا ايه؟
هيا ممكن حبها ليا يقل اصلك لما تحبي حد وبعدين متحسيش انه بيحبك او صوته بيطمنك بيخليكي تقربي منه اكتر هيا ممكن حبها يقل ولا مش هيقل اصلها بتاخد دروس كتيره واكيد في ولاد وهيا بصراحه جميله جدا مش هقدر اوصفها ليكي

بخصوصها هيا لو فعلا كانت بتحبك بجد هتفضل تحبك مهما حصل حواليهاولو كان اللى جواها مشاعر مراهقة هتنتهى بس مش معنى ده انها ترفضك مثلا هيا حتى لو مشاعرها كانت مراهقة وانتهت ممكن برضة ما تكونش وقتها حبت واحد تانى وشايفاك برضة فارس آحلامهاولكن لو حصل بقى ونسيتك وحبت واحد تانى يبقى خلاص أعتقد انك مش هتقبل ترتبط بواحدة بتحب حد تانى او مش قابلة الارتباط بيكوفى الاول والاخر دى مسألة نصيب وتأكد ان اللى ربنا كاتبة ليك هيكون بس المهم اننا نعمل الصح علشان ربنا يرضى عننا ونقدر ندعية باللى جوانا

فى أنتظار كل مشاكلكم على

hallalmashakel@gmail.com

أنا والأثنين

انا مهندسه طول حياتى لم افكر فى الحب والارتباط حتى احقق حلم والدى الله يرحمه فى ان اكون مهندسه وبالفعل تخرجت واشتغلت الحمد لله وبعد التخرج تعرفت على شاب مهندس بس كان من بلد تانيه من الصعيد وانا من بلد ساحليه لكن اعجبنى شخصيته واتفقنا على الزواج وبالفعل طلب انه يتقدم ولكن اهله رفضونى لانى من بلد بعيده وكانوا عايزين يجوزه واحده يعرفوها ووالدتى رفضت لانى سوف ابعد عنها وهو حاول يقنع اهله لكن بدون جدوى وبعد عنى ومبقاش بيرد على التليفون واستسلم ويقفل فى وشى السكه علشان اكرهه وبالفعل بعدنا واتعقدت من الحب

واى حد كان بيتقرب منى كنت ببعد لكن تشاء الظروف واتعرف على واحد من نفس بلد حبيبى الاولانى احسست انه يعرفه وانها لعبه عليا وكان مصمم يتقربلى ويعمل اى حاجه علشانى ولما واجهته وقولتله انه يعرف حبيبى الاولانى قالى لا وانه ميعرفوش ولكن باهتمامه بيا واعترفلى بحبه ليا حسيت انى بتشدله فى وقت حسيت انى لوحدى لكنى مكنتش قادره انسى الاولانى ولكن كنت حاسه انى تعبانه نفسيا والتانى كان محاصرنى بس هو كان حاسس انى بفكر فى الاولانى فعلشان كده صمم يعرف اسمه بالكامل منى ويجبلى اخباره وكان بيقولى ده اكيد خطب وانى انساه وبالفعل قالى انه خطب وانى مفكرش وانى ابدا حياتى معاه لكنى اتصدمت وبدات احس انى لسه بحب الاولانى وانى لازم ابعد عن الشخص التانى علشان مظلموش وبالفعل قولتله يبعد عنى ويشوف حياته فهاج وتحول لشخص اخر يلاحقنى برسايل الدعاء عليا وانى ظلمته وانى بحب شخص ميستاهلش وانه بيدعى عليا فى كل صلاه مع انه كان يعلم انى بحب شخص اخر وكنت بحاول انساه لكنى لم استطيع فعلشان كده بعدت عنه علشان مظلموش وبعد ذلك رجع حبيبى الاولانى يتصل بيا وعايز يرجعلى وعايز يسيب خطيبته علشانى لكنى مع انى بحبه لكنى لا استطيع الرجوع له واظلم واحده مالهاش ذنب انا تعبانه وحاسه بالذنب هل فعلا انا ظلمت الشخص التانى انا كنت مفكره انى حنسى الاولانى وان التانى مدام بيحبنى ححبه لكنى لم استطيع وفى نفس الوقت حاسه بعذاب الضمير انا مبنامش بس انا مخدعتوش ولا كدبت عليه يمكن غلطتى انى كلمته بس بجد هو كان محاصرنى وانا كنت فى حاله نفسيه وحشه بس هو مش سايبنى فى حالى وكل شويه يبعتلى رساله يدعى عليا فيها بس هو مكنش بيحبنى لان اللى بيحب حد ميدعيش عليه كده انا عمرى مادعيت على اللى كنت بحبه مع انه جرحنى وكان بيقفل فى وشى السكه وبعد من غير مايفهمنى موقف اهله احنا كنا متفقين على ميعاد يجى يتقدم فيه ومجاش انا مفهمتش ان اهله كانوا رافضين الا بعد مده بس برغم ذلك كنت بدعيله ربنا يوفقه بجد

اعمل ايه انا خايفه اكون ظلمت وعلشان اتظلمت وحسيت احساس الظلم خايفه اكون جرحت انسان غصب عنى بجد انا تعبانه اوى اعمل ايه ؟

فى البداية مفيش مشكلة أنه يكون عندك طموح وتحاولى توصلى له وتسعدى بيه أسرتك والحب والأرتباط ماكانش ابدأ هيعطلك ولكن اللى حصل أنك لما لاقيتى واحد أدتيلة كل مشاعرك اللى كنتى قافلة عليها جواكى من سنين وطبعا بسبب أهله وأهلك الموضوع ما تمش ويمكن كل شىء نصيب وإنتى كان لازم تحاولى تنسيه وتعيشى حياتك لأن بعد كل المشاكل اللى حصلت ماكانش ينفع ترجعوا لبعض

مع أعتراضى طبعا على تفكير أهله ووالدتك فى مسألة بعد المسافات لأنها مش سبب للرفض ولكن تفكير أهله هو تقريبا نفس تفكير أغلب أهل الصعيد بيحبوا ولادهم يتجوزوا من بلدهم والشاب للأسف كان موقفه سلبى جدا وماحاولش يعمل حاجة بسبب حبكم والأحسن أن الموضوع ما تمش لأن من الواضح أن شخصيتة ضعيفة جدا قدام أهله وكان مع أى موقف بينك وبينهم هيقف يتفرج وينحاز ليهم

حاولى تنسية تماما وطلعيه من بالك وخيالك

بالنسبة للشاب التانى هو فعلا شاب مش سوى مية فى الميه لأنه على الرغم من معرفته بأنك لسة بتحبى واحد تانى أستمر فى ملاحقتك وأنا بحملك الجزء الأكبر من اللى حصل لأنك انتى اللى سمحتى له يعمل كده هو شكله أساسا كان بيتسلى وشاف واحدة خارجة من قصة وتجربة ومجروحة وسهل جدا أى كلام يأثر عليها وده اللى حصل إنتى كنتى فى حالة نفسية سيئة ومحتاجة أى كلمة من أى حد وتخيلتى أنك ممكن بسهولة تنسى واحد بواحد تانى ولما لاقيتى نفسك دخلتى فى دوامة تانية وحبيتى تطلعى منها هو طبعا معجبوش لأنه كان استلذ التسلية وإنتى فعلا اللى أدتيلة الفرصة لكده ولكنه كان عارف أنك ما بتحبيهوش وده أكبر دليل على أنه كان بيتسلى

بالأضافة الى موضوع الرسايل وبيدعى عليكى والكلام ده ده أكبر دليل على أنه ما كانش بيحبك بجد لأنك زى ما قولتى انك كنتى بتحبى الاولانى وعمل فيكى كتير وعمرك ما فكرتى تدعى عليه ولا تعملى نص اللى التانى عمله

يبقى تحمدى ربنا أنك فوقتى بدرى وقدرتى تقطعى علاقتك بيه وياريت فعلا لو لسة فيه بينكم كلام تنهيه فورا وغيرى رقمك وحاولى تبعدى عنه بأى طريقة

وبالنسبة للشاب الأول ما أنصحكيش حتى لو ساب خطيبته ترجعى له

حاولى تنسى الأتنين وتعيشى حياتك وخدى وقتك علشان تهدى وأكيد هتقابلى اللى يستاهلك إن شاء الله

منتظرة كل مشاكلكم على

hallalmashakel@gmail.com

مشكلة من شاب

مشكلتي من نوع مختلف ، انا احترت فيها ومش عارف استشير مين لان ناس كتير ممكن تفهمني غلط بس انا نفسي الاقي الحل الصح اللي افضل راضي عنه طول عمري

الحكاية اني كنت بعرف بنت قريبتي وزميلتي ايام الجامعه وكانت العلاقة بينا قوية جدا وكنت ناوي علي ارتباط وخطوبة وجواز لكن الظروف ما كانتش سامحه غير بعد ما اخلص الكلية ، هي اتخطبت وسابتني بطريقة غريبة جدا انها راحت اتخطبت من غير حتي ما تقولي مع ان العلاقة بينا كانت كويسة جدا وحصل دا فجأة بدون أي مقدمات او تلميحات

وهنا اول سؤال في مشكلتي ،انا تقريبا سامحتها لاني بكلمها تفتكروا ان دا صح؟

نيجي بقا للنقطة الاهم هي اتخطبت والكلام دا من سنتين ، وبعدين انا عرفت رقمها عن طريق الصدفة وبدأنا نتكلم تاني كأصدقاء ساعات بنتكلم كذا يوم ورا بعض وساعات بنقطع ، انا عارف ان الحكاية دي غلط لكني ساعات بقنعها انها تكلمني لاني فعلا بحبها حتي لو ما ينفعش بس تقدروا تقولوا اني بحس اني مبسوط معاها وشغل هرمونات الحب بيشتغل معاها جامد ،القلب يدق وكدا..

المهم انا دلوقتي مش عاجبني الوضع ، هي بالرغم انها بتكلمني وممكن تكون بتخاطر انها بتكلمني ومبسوطة انها بتكلمني وكدا بس هي بتميل اكتر للارتباط العادي وشايفه ان كل الحب غش وان الحب مالوش لازمة وان الحب حاجة والجواز حاجة تانيه وان الناس اللي بيتجوزوا صالونات بيكونوا مبسوطين اكتر وهي ليها امثلتها وافكار غريبة كدا تحس انها انتهت من 20 سنة

نسيت اقولكم ان خطيبها اغني مني لانه مهندس وكبير شغال من فترة في احدي دول الخريج ، بينما انا لسه يادوب بابتدي حياتي لكني قادر علي تكاليف الزواج طبعا ، طبعا واضح ان خطيبها غير قادر علي كسب حبها والا ماكنتش هتكلمني

يمكن انا اقرب ليها عشان السن وكدا وعشان كمان اننا شكل بعض في الاهتمامات والكلية

دلوقتي السؤال المهم اللي انا محتاج اعرفه ، انا ادامي حل من اتنين

الأول :اني احاول اكلمها عن مساوئ جواز الصالونات واقنعها ان الجواز عن حب احسن وابدأ اعمل مقارنات في المستقبل بيني وبين خطيبها ودا مش هعمله غش ، هي دي فعلا وجهة نظري اللي انا مقتنع بيها انا شايف ان الجواز عن حب احلي .. هل اعرض عليها افكاري دي واحاول اقنعها بيها وبالتالي ممكن تسيب خطيبها وكداولا مادامت مقتنعه بالافكار دي يبقا ما تستاهلش اني افكر فيها ، وان الافكار جزء من الشخصية اللي ما ينفعش اغيرها ، الي جانب ان مع كل اللي حصل ممكن يكون الاربتاط بينا مالوش طعم

عايز اقولكوا انها بتقتنع برأيي زائد اني عشان مقتنع بافكاري بقدر اقنعها ، بس الاهم اني اعرف اللي بعمله دا صح ولا غلط؟

ياريت تلاحظوا ان حب ماقلش من سنتين بالرغم اني حاولت ارتبط بغيرها محاولات جادة

أولا كان المفروض أول ما البنت أتخطبت أنك تقطع علاقتك بيها تماما وغلط جدا أنكم تفضلوا تكلموا بعض

ثانيا موضوع أن أفكارها أن جواز الصالونات أحسن خلاص هيا حرة فى تفكيرها وأختياراتها وهيا اللى تتحمل نتيجة أختيارها وبلاش تحاول تقنعها بتغيير فكرتها لأنه معلش أنت نفسك مش هتثق فيها بعد كده لأنها كانت مخطوبة لواحد وبتكلمك وبالتالى حتى لو سابت الواحد ده وأرتبطت بيك دايما هتكون شاكك فيها وفى تصرفاتها وهتقول فى بالك ما هو زى ما كانت بتكلمنى وهيا مخطوبة ممكن جدا دلوقتى تكلم أى واحد تانى

غير إنى مستغربة جدا أزاى هيا تسمح لنفسها تعمل كده

اللى أنا شيفاه أنها بتتسلى بيك ومعلش اعذرنى فى الكلمة هيا شايفة واحد بيحبها وعايز يرتبط بيها وحتى بعد ما أتخطبت لسة بيكلمها وفيه نوعية من البنات بتحب تثبت لنفسها أنها مازالت مرغوبة أو تكون عايزة تتسلى الله أعلم بيها

ولكن عليك أنك تقطع علاقتك بيها فورا وتحاول تبدأ حياتك من جديد مع واحدة تقدرك وتقدر مشاعرك وتقف جمبك وتبنوا حياتكم ومستقبلكم مع بعض

أود أن أطلعك علي آخر أخباري وتجربتي

بالرغم من أني اعرف الفتاة موضع المشكلة من أربع سنوات وبالرغم من أنها قريبتي وبالرغم أيضا من أنني لست بالشخص الساذج الذي من الممكن أن تتصورينه إلا إنني اكتشفت أني قد خدعت في تلك الفتاة وأخذت عنها صورة عكس ما هي فيه

توهمت أنها قمة الرقة والبراءة والرومانسية وتصورت نفسي المنقذ لها، لكنها كانت عكس ما تصورت تماما

في الفترة بين إرسالي المشكلة وردك عليها استطعت أن اعرف أنها في خلال فترة خطوبتها قد تعرفت علي شاب ثالث لديه سيارة وظلا علي علاقة طويلة فترة طويلة قبل أن يتركها (كل هذا وهي مخطوبة

إلي جانب أنها الآن علي علاقات عديدة علي الانترنت ( في الوقت الذي كانت تحدثني أيضا

وبدون أي تفصيلات اسمحي لي أن أقول أن كان كلامك صحيح مئة بالمائة هي فعلا كانت بتتسلي وعايزة تثبت أنها مرغوبة وعندها حاجة غلط نتيجة لتعدد علاقاتها التي لم أكن أتصورها

اكرر شكري علي مشاركتي وأحب أن أطمئنك علي أنني بمجرد أن عرفت تلك الحقائق خرجت من قلبي نهائيا حتى أنني لم أكن أتصور أنني عرفتها في يوم من الأيام ،وتعافي قلبي نهائيا من المشكلة ، اشكر الله أنني عرفت الحقيقة وهداني للصواب

أنا وهو

أنا عندى مشكلة نفسى حد يشاركنى فيها واسمع ارائكم

انا اتعرفت بشاب من خلال عمل مؤقت اول ما اتعرفت علية هو كان شخص ملتحى وانا كنت مش محجبة قربنا من بعض واتعرفنا على بعض اكتر وحبينا بعض وطلب منى انى البس الحجاب وانا لبست الحجاب

وغيرت فى نفسى حاجات كتير اوى غيرت فى لبسى وفى تعاملاتى مع الناس واتغيرت نوعا ما بس ما وصلتش للمرحلة اللى هو عايزنى عليها لانة عايزنى البس النقاب وانا مش قادرة اعمل كدة خالص وفى اختلاف كبير فى الطباع بينة وبينى وبالرغم من كل الاختلافات دى الا ان احنا بنحب بعض اوى لكن انا مش قادرة اعمل اللى هو عايزة ولا هو قادر يتنازل عن النقاب

انا بحبة اوى وهو كمان هو راح لاهلى واتقدملى لكن اهلى معارضين عشان عارفين انى مش هكون مرتاحةوانا تعبانة اوى ومش قادرة اسيبة ابدا حاولت كتير ابعد عنة لكن مش قادرة وخصوصا ان هو بيحبنى جدا وعمرى ما هلاقى حد يحبنى زية

انا عملت صلاة استخارة كتير اوى لكن كل ما نسيب بعض نرجع تانى والموضوع مالوش نهاية نفسى مش عارفة اعمل اية احاول اعمل اللى هو عايزة وانا مش مقتنعة بية واتخطب لة واجرب ولا اسيبة والحق الموضوع فى اولة انا خايفة اوى ومش عارفة اعمل اية ياريت حد يساعدنى ويحس بمشكلتى

بداية مش عارفة أعبر لك أزاى عن حاجات كتير جوايا بس هاخدها معاكى واحدة واحدة

أولا إنتى بتقولى أن الشاب اللى إنتى عرفتى ملتحى وأنا اللى أعرفه أنه الواحد اللى بيوصل للدرجه دى لازم يكون متدين جدا وحتى لو إنتى عجبتية المفروض كان يدخل من الباب على طول من غير ما تتكلموا مع بعضالغريبه إنك كنتى غير محجبة وهو بص لك يعنى هو فيه عيب خطير أنه بيبص للبنات وعينه زايغة لأن المفروض أن الملتحى دة يكون ملتزم بدينه قوى ولا أيه

وكمان فضلتوا تكلموا بعض وحبيتوا بعض وأستمر الموضوع وكمان طلب منك أن تتحجبى وأنتى أتحجبتى علشانه

أولا موضوع أنك تتحجبى علشان حد مرفوض لأن إنتى المفروض تكونى مقتنعة بالحجاب

وثانيا هو الواضح أنه من النوع الأستغلالى وواضح أن شخصيتك ضعيفة جدا قدامه وده أكيد هيتعبك بعدين لو أرتبطوا لأنه بيستخدم معاكى أسلوب الضغط أنه يفضل يطلب منك طلب وما يسيبكيش الا لما توافقى عليه وده طبعا غلط لان كده شخصيتك أتعدمت

وكمان فيه أختلاف فى الطباع بينكم وعمركم ما هتتفقوا الحب لوحده مش كفاية علشان تتفق طباعكم وده اذا كان حب من الأساس

وبعدين هو طالب منك حاجات وانتى مش مقتنعه بيها يبقى أزاى هتكلموا حياتكم كده

الأحسن أنك تنهى الموضوع لأنه محكوم عليه بالفشل

ولو مش قادرة تنهيها ممكن تتخطبوا وصدقينى هتعرفى بنفسك أنكم ما تنفعوش لبعضهو لو كان فعلا كويس ومتدين ومحترم كان دخل البيت من بابه على طول وكمان لما أهلك رفضوه كان المفروض يبطل كلام معاكى وإنتى كمان كان المفروض تنهى علاقتك بيه

وياريت فعلا تنهى علاقتك بيه زى ما قلت لك لو مش نافع تنهوا العلاقة أعملوا خطوبة وشوفى بس صدقينى نهاية العلاقة دى أحسن حل

نرحب بكل مشاكلكم على

hallalmashakel@gmail.com

الحب والموت

انا اسمى ...........وبجد عندى مشكله تلفتلى اعصابى ومش عارفه اعمل ايهاتمنى انكو تساعدونى ...............المشكله هى انى من اكتر من 5 سنين عرفت من اصحابى ان فى حد بيحبنى اسمه
اسامه بس انا ماكنش موضوع الحب دا فى راسى لانى كنت ثانويه عامه وكنت لسه نازله مصر ومعرفش اصلا يعنى ايه صداقه بين ولد وبنت

بس هو كان موجود فى كل مكان اروح فيه وللاسف لانه ساكن جنبى والكلام كتييييييييييييييييير على الناس اخويا عرف انه بيكلمنى وان الناس بتشوفو فى المكان الى كنت بتواجد فيه

وحصلت خناقه كبيره بينى وبين اخويا الكبير وانا معرفش ليه ؟؟؟؟؟؟؟؟؟؟؟

لانى اصلا مكنتش بكلموا طبعا انا ادايقت جدا وقلت لازم اكلم الولد دا واعرف هو بيعمل كدا ليه كفايه المشاكل الى حطنى فيها وفعلا كلمتو وكنت حاده جدا معاه وان عيب جدا الى هو بيعملو داوفعلا كان ابن حلال ومكلمنيش ولا حتى حاول يشوفنى تانى

ويعد 3 سنين طبعا كانت علاقته باخويا بقت احسن وبقو اصحاب جداااااااااا بس انا اتفاجئت برقم بيكلمنى وبيقلى انه واحد صاحب اسامه وان اسامه بيحبنى وعايز يتقدملى

انا بصراحه اترعبت عشان دا كان صاحب اخويا وكدا المشكله هتكون اكبر من الاول مكنتش عارفه اعمل ايه بس قلت لازم اكون جامده فى قراراتى معاه وقلتلو الى عايز يعمل حاجه بيخش البيت من الباب ولو هو عايز رايى فأنا شيفاه اخ مش اكتربس للاسف اسامه كان ملح جدااااااااااااالدرجه انو قالى خلاص انا هبقى جنبك اسأل عليكى واطمن على اخبارك كل يوم لحد متحبينى بس انا ساعتها كرهت الى قالو لانى مش ممكن اعلق حد جبنى على امل لاحبو لمحبوش؟؟؟؟؟؟

وانا مرعوبه جداااااااااااااااوكررت نفس الى حصل من 3 سنين من معامله جافه وقلت زوق معاه وتقليل من احترامه

وبصراحه هو كان حساس جدا وبصراحه حبنى جدا بس انا ماكاش يايدى حيله

بس بعد وقت مش كبير حولى 5شهور عرفت انه خطب وقررت انى اعتذر ليه عن اسلوبى السخيف معاه وقلت زوقى وقررت انه لما يكلمنا فى العيد عشان يعيد على ماما هعتذرلي

هوسبحان الله يتكلم 3 مرات وانا الى ارد عليه بس معرفش ليه لسانى كان ملجوم ساكت متكلمش معتذرش بجد ندمانه ........ندمانه جدا ومش مسامحه نفسي

لانه تالت يوم العيد خرج مع اخويا بالعربيه راحو اسكندريه وهما راجعين عملو حادثه

واسامه مات الله يرحمو بس انا مش عارفه اعيش وانا معايا الذنب دا ليه معتذرتش وانا عارفه انى جرحتو

ليه معتذرتش ليه............ليه؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟انا من يوم الحادث لحد دلوقتى مش بنام بتعذب لكل يوم خاصه لما والد اسامه طلب من اخويا وقال له خلى اختك تدعى لاسامه؟؟؟؟؟؟؟؟؟؟؟؟؟؟؟ودا قتلنى اكترانا بدعى ربنا ان اسامه يسمعنى ويسمع اعتذارى بس مش عارفه اتاقلم مع الى حصل ساعدونى بجد وحلولى الموضوع دا لانو بجد بيجننى وبتعذب بيه كل يوم

أهلا بيكى عزيزتى عزيزتى موقفك من الشاب أسامة أول ما عرفتى حكايتة كان سليم لأن الدخول من باب البيت أفضل بكتير من الكلام من ورا الأهلولكن بعد تكرار موقفه عليكى وبأنه بيحبك كان ممكن لو هو فعلا شاب كويس تبلغى أى حد واسطة بينكم أنه يتقدم عن طريق البيت وصدقينى أخوكى ماكانش هيزعل ولا حاجة لأن أسامة هيكون أتصرف التصرف الصحطبعا الكلام ده متأخر جدا بس أنا بقوله علشان لو أى واحدة تانية فى موقفك تتصرف فية كدهبخصوص وفاه أسامة وأحساسك بالذنب عزيزتى انتى ما غلطيش بالمرة لأنك كنت كويسة ومحترمة ومش عايزة تكلمى شاب من ورا أهلك وموضوع اعتذراك لية من عدمه ماكانش فعلا هيقدم شىء أو هيأخره فى موضوع وفاته لأن الأعمار بيد اللهلو فعلا عايزة تعملى حاجة تريحى بيها ضميرك حاولى تدعى له كتير وطلعى صدقات لية وصدقينى ده هيريحك وهيريحه هو كمان بتمنى أكون قدرت أساعدك وفى أنتظار ردك وأستفسارك عن أى شىء

فى أنتظار كل مشاكلكم على

hallalmashakel@gmail.com

غياب الأب

انا لا اريد حلا ولكني اريد رايا عاقلا عالما اكثر مني بمجريات الامور في الحياة ...انا فتاة في ال 24 من العمر ولي ثلاثة اخوة يصغروني سنا ووالدتي متوفية منذ 10 سنوات ومن هنا بدأت المشكلة ...

والدي رجل طيب في قلبه ولكنه للاسف يفتقر للاحساس بالمسؤولية .. وقد كانت والدتي هي المسؤوله عن تنظيم حياتنا واسلوب معيشتنا حتى عن الطرق التي سنصرف بها اموالنا...رحمها الله كانت عاقله مدبرة ..وفكرت كثيرا في مستقبلنا وفي تأمين حياتنا فقامت بادخار كل الاموال التي وقعت في يدها لتشتري قطعة ارض تبني عليها بيتا لنا في مصر فقد كنا نعيش في الكويت منذ ولدنا فقد تقابل والداي هناك وتزوجا هناك وانجبونا هناك وعشنا عمرنا هناك ...وكانت امي تتابع العمل في العمارة التي بنتها لنا في كل صيف تاتي فيه الى مصر وهذا الى ان توفاها الله في عام 1999...وبسبب وفاتها اخذتني خالتي التي كانت في الكويت ايضا لاعيش معها بحجة اني لن اتمكن من الاهتمام بدراستي بجانب الاهتمام باخوتي وابي ... وكنت صغيره حينها فذهبت وعشت معها .. ثم قررت خالتي ان تاتي لتعيش في مصروبالطبع اخذتني معها واكملت دراستي هنا وها انا الان اعمل هنا .. اي اني منذ وفاة امي لم يجمعني باخوتي بيت واحد لاكثر من شهر كنت اقضيه معهم في اجازة الصيف..وفي ظروف غير ظروفي وفي وجود اب غير ابي كنت من المفروض ان اكون مرتاحه البال لوجود اخوتي مع ابي .... ولكني على العكس تماما.... فاليكم افعال ابي ..هو رجل غير متدين ... بل انه لا يعرف شيئا عن الدين .... ولم اره يصلي ابدا ... ثم اسفر هذا عن ان لا شيء محرم عنده فكل شيء مباح ... نعم كل شيء يمكن ان ياتي في بالكم الان هو مباح عند ابي ....كل هذا تحملته وحاولت ان اصلحه كثيرا ولكن بلا امل ... فصدق الله حين قال انك لا تهدي من احببت ولكن الله يهدي من يشاء ...تزوج بعد موت اني بعام بامرأة تسوءه اخلاقا وتبعد اكثر عنه عن الدين ... بل اني اكتشفت بمحض الصدفه بانه كان على علاقة بها قبل موت امي بسنين طوال ....كل هذا ولم اكرهه فهو ابي ....ولكني وفي الصيف الماضي عرفت ما لم استطع ان اتهاون معه .... لقد علمت انه اعطى لزوجته تلك شقة في عمارة امي التي بنتها بكل قرش كسبته بتعبها هي وحدها ....اعطاها شقة في الذكرى الوحيده الباقيه لنا من امنا .... وفي الشيء الوحيد الذي نامل ان يبقى لنا بعد ان يضيع ابي كل امواله على اهوائه وشهواته ....لقد شوه الشيء الجميل الوحيد لنا...ولم يكفيه هذا بل ايضا اعطاها توكيلا عاما لتتصرف في امواله واموالنا بما لا حق لها ....وانا اقول ان لا حق لها لانها لم تكن لنا اما ولم تكن لما سندا ولم تكن له هو ايضا سندا حين كنا صغارا ومحتاجون لام او لاحد يعتني بنا ...فقد تزوجها ابي هنا في مصر وابت ان تعيش معنا في الكويت ولم نرها سوى مرتين او ثلاثه ولم تفعل لنا شيئا ولم تحمل مع ابي مسؤولتنا فكيف اعتبرها زوجه ابي او احدا له حق في اموالنا ... حتى وان كان لها حق فليكن في اموال زوجها لا اموال امنا ....وبعدها بعد ان تحملت من ابي كل الوان التصرفات الصبيانيه الشهوانيه اللاعقلانيه ... بعد هذا الفعل .... كرهته ....نعم انا اكرهه ... فغلطاته اتخمتني حتى اصبحت غير قادره على مسامحته ....ولكني لن اهدأ ولن يغمض لي جفن الا بعد ان احمي حق اخوتي منه وابعد يديه عن اموالنا وعن العمارة التي لا حق له ولا لزوجته فيها ....ولهذا وبعد ان انهيت دراستي لم اسافر لاعمل في الكويت كما كانت رغبه ابي بل بقيت هنا لاتابع وابحث الاوضاع واحمي حق اخوتي الصغار ونتيجة تعب امي طوال سنين الغربة..ولكن ما يقيدني اني لا خبرة لي في كيفية التصرف في مثل هذه الحال ولا اعرف ابدا من اين وماذا افعل وكيف اتصرف ... احتاج لنصيحه احد ناضج وعلى علم بمجريات الامور واعتذر ان لم اكن وضحت كل جوانب المشكله فهي مشكله متفرعه ولا اعرف من اين ابدا ومن اين انتهي ولكني مستعده لتوضيح اي شيء غير واضح....وشكرا...

عزيزتى أولا رحم الله والدتك وأدخلها فسيح جناته ان شاء اللهثانيا بخصوص والدك بتمنى ربنا يهدية ويفوق ويحاول يحافظ عليكى وعلى أخواتك ومفيش فى ايديك شىء غير أنك تدعيلة وثانيا تحاولى توسطى حد قريب من والدك يكلمه فى موضوع زوجته والتوكيل اللى عمله لهاثالثا عليكى أنك تحمدى ربنا أنك ما شربتيش من والدك طباعه وبقيتى أنتى وأخواتك بتعملوا زيه رابعا فيه نقطة مهمة قوى وياريت لو قدرتى تجيبى أخواتك يعيشوا معاكى فى مصر هيكون أحسن مليون مرة وتحاولى تعوضيهم عن اللى فات وتقربوا من بعض أكتر وتحاولى تصلحى اللى والدك وزوجتة عملوه فيهم لأن أكيد فيه ضرر بقى فيهم وأكبر ضرر هو الضرر النفسى فلو قدرتى تجبيبهم يعيشوا معاكى هنا يكون أفضل مليون مرة خامسا بخصوص العمارة اللى بنتها والدتك هو أولا عايزة أعرف حاجة العمارة بأسم مين والدتك ولا والدك لأنها لو بأسم والدتك يبقى أنتى دلوقتى ليكى الحق التصرف فى نصيبك فيها بحكم الميراث لأنك عديتى السن القانونى ولو كان والدك وصى عليكم زمان دلوقتى أنتى كبرتى وتقدرى تتصرفى فى الجزء الخاص بيكى وحتى لو كان والدك أدى شقة لزوجتة وأنا برضة عايزة أعرف منك هو أداها ليها بعقد بيع وشرا ولا أزاى ولو فعلا حصل كده يبقى مش هتقدرى تطلعيها منها بس على الأقل انتى ليكى نصيب فى العمارة وأخواتك كمان وتقدرى تحصلى على نصيبك ده وتتصرفى فيه زى ما تحبى وكمان لو كانوا أخواتك عدوا السن القانونى يبقى ليهم نفس الحق ولو ماكانوش أعتقد هيكون لوالدك الحق فى التصرف فى نصيبهم لحد ما يعدوا السن القانونى ولو فعلا رسيت الحكاية على نصيبك انتى اتمسكى بيه حتى لو كان شقة او اتنين وهاتى أخواتك وعيشوا فيها وحاولى تعوضيهم على اللى فات ياريت تبعتيلى توضيح أكتر وتعرفينى العمارة مكتوبة بأسم مين علشان أقدر أقولك تعملى ايه بالظبط لانها لو بأسم والدتك يبقى هيكون ليكى نصيب فيها انتى واخواتك وطبعا هيكون لوالدك نصيب وهو له الحق فى التصرف فيهفياريت تبلغينى الحكاية دى وأنا هقولك تعملى ايه بالظبط وتتصرفى أزاى
وياريت تدعى دايما لوالدك بالهداية وان شاء الله ربنا يتقبل ويهديه وربنا يثبتك يارب وتقدرى تكملى المشوار
مستنية ردك عليا
خالص تحياتى
فى أنتظار كل مشاكلكم على

hallalmashakel@gmail.com

الغربة والزواج

المهم انا بس كنت عايز اتكلم في موضوع محيرني شويتين ثلاثة ان انا مثلا ( وزيي كتير ) مسافر في بلد عربي اشتغل و اتغرب و ......... ( طبعا عارفين بقية الفيلم
طيب السؤال هنا انا لما احب اتجوز ( وانا اساسا عايز يعني ) اعمل اية هل ان المنطقي وبمنتهي السهولة اني اكلمهم في البيت فيجيبولي اسم اتنين تلاتة وانزل في شهر ( اللي هوا الاجازة ) اني اشوفهم واختار وافهم البنت دي ( خصوصا ان اهم حاجة هيا تفكيرها ازاي ودة مبيكونش مكتوب علي جبينها بالبنط العريض يعني انها بتفكر كويس وطموحة ولا ملهاش في اي حاجة )ودة انا مش مقتنع وفي نفس الوقت صعب في الغربة المنيلة دي اني اقابل واحدة احبها وتحبني واتفاهم معاها ( ودة صعب مش سهل في السفر ) وبعد كدة انزل بيها ونشوف رحلة المعاناة في اني اقنع اهلي واهلها بالموضوع دة خصوصا ان الاهل طبعا مبيكونوش عارفين اي حاجة عن بعض وعننا احنا كمان علي العموم انا لسة مجربتش لا دة ولا دة" وعلي فكرة ليا برضة اصدقاء بنات واعرفهم و بحترمهم بقالي سنين يعني انا مش عايش في قمقم ولا حاجة يعني "
طيب يبقي الحل اية بقي استني الصدفة ولا اني افضل اسلم علي كل واحدة راكبة معايا في الطيارة يمكن
خلي بالكم برضة ان الولد برضة ( في منهم يعني مش كلهم ) بيكونوا عايزين يحسوا بالطرف التاني ويحبوا ويتحبوا ويعيشوا حياة ظريفة مش يسيبوها للصدفة يعني بعد اول طفل وهوا بيكتب اسم الام في شهادة الميلاد اية دة فتكات مين اية الاسم الغريب دة
فجربوا كدة نفكر في الموضوع دة وخلوا بالكم دة مش موضوع رجالي خالص لان اي علاقة بين اتنين البنت والولد هما اطراف الموضوع فمينفعش نتكلم عن طرف واحد
بس هوا دا سؤالي اية المفروض ان الواحد يعملة علشان ميهينش الطرفين


أهلا بيك معانا وشكرا على ثقتك فيناوبالفعل مشكلتك هى مشكلة ملايين من الشباب مثلك ولكن حلها بسيط وممكن بكل بساطة تحدد أهم الصفات التى تريدها فى شريكتك وتعرضها على أهلك وهم بدورهم سوف يرشحون لك عده فتيات
رتب كل أفكارك قبل الزيارة وحدد أهم النقاط التى تود معرفتها منها وناقشها فى عدد من الموضوعات لتعرف تفكيرها وعقلها وبالطبع ليست زيارة واحدة كفيلة لمعرفتك هل هذه هى المناسبة أم لا ولكن كرر الزيارة حتى ترتاح نفسيا لأى فتاه وعندما تجد ميولك وتفكيرك متفقة مع أحداهن أرتبط بها فورا بدون ترددأتمنى أن أكون قمت بمساعدتك بالقدر الذى يريحك ويحل لك مشاكلك مع تمنياتى لك بحياه سعيدة وهانئة وموفقة إن شاء الله

وفى أنتظار كل مشاكلكم على
hallalmashakel@gmail.com

مشكلة الأهل مع التكنولوجيا

مشكلة الأهل مع التكنولوجيا مثل النت والموبايلالمشكلة تتلخص فى عدم فهم الأهل لطبيعة هذه التكنولوجيا وأعتقادهم أنها وسائل لأضاعة الوقت والنقود والتسلية وأقامة المشاكل
يعتقد الكثير من الأهل أن النت وسيلة لأفساد شبابهم لا لتقدمهم أو للأستفاده منه فهم يرون أنه لا فائدة منه على الأطلاق وأنه لا نتيجة من أستخدامه غير أقامه العلاقات المشبوهة والكلام مع أى شخص وهذا ما يسمى بالشات وتضييع الوقت والتعرض للمشاكل نتيجة التشهير بهم من خلال أى شخص يريد العبث وأيضا التعامل مع الأيميل والمنتديات والمواقع هم يرون أنه سبب للكثير من المشاكل
وأيضا هم يرون أن الموبايل كارثة كبيرة ولا فائدة منه وأنه مضيعة للنقود وللوقت أيضا ويقولون أنه وسيلة أخرى لأفساد الشباب لأنه من السهل عليهم أن يكلموا أى شخص فى أى وقت وأن يرسلوا اليه رسائل وأن الموبايل مشكلة كبيرة وخصوصا للبنات وأنه ممكن يكون فرصة لمعاكسة البنت من اى شاب وفرصة كمان لأقامة أى علاقة

وأعتقد أن هذه المشكلة ليست مشكلة فردية ولكنها مشكلة جماعية وكثير من شبابنا يشكون من هذه المشكلة ويشكون من عدم تفاهم أهلهم معهم فى هذا الموضوع ولذلك هم يلجأون الى التعامل مع هذه الأشياء فى السر فمثلا النت يدخلون عليه بعلمهم ولكن لا يكون عند علم أحد منهم ما يفعلة أبنهم أو أبنتهم
وأيضا الموبايل نرى أن الشاب أو الفتاه يستعملوه أيضا بسرية فكثيرا ما يغلقوا صوت الموبايل حتى لا يعرف أحد من يتصل بهم أو يرسل لهم رسائل
ولكن يجب أن يصل صوتنا لهم ويجب أن يعرفوا أهمية التكنولوجيا فى حياتنافالنت له فوائد عديدة ومميزات لا حصر لها فمنه نتعلم أشياء كثيرة يكفى فائدة البحث عن طريق جوجل فمنه نستطيع الوصول الى معلومات لا حصر لها وهذه ميزة من مميزات النت ولكنها مفيدة الى درجة كبيرة وهذا بجانب فوائد عديدة منها الدخول الى الكثير من المواقع العادية والأخبارية والكثير من المنتديات التى تفيد الناس بكل شىء ولذلك يجب أن يعرف الأهل كل هذا وأن يقتنعوا
أنا أعلم أن الموضوع فى غاية الصعوبة لكن بالأقناع سوف يتم كل شىء فمن الممكن أن يروا معكم أى موقع به معلومات أو أخبار أو أى منتدى أو أى شىء حتى يقتنعوا بمدى فائدة النت ومن الممكن أيضا أن نستشهد برأى أى شخص من العائلة فى أى جلسة عائلية ويتكلم عن موضوع النت وفائدتة وهكذا حتى يقتنع الأهل
والمشكلة الأكبر ن الأهل يرفضون النت بسبب ما يسمعوه ويشاهدوة ففى الكثير من القنوات التليفزيونية نجد برنامجا أو مسلسلا يتحدث عن النت كأنه جرثومة وكأنه العدو الأول للشباب ونجدهم يحكون عن فلان أو فلانه الذى عرف أشخاص عبر النت وحدثت بينهم علاقة او مشاكل وأيضا نجد فى الصحف العديد من الحكايات المماثلة وهذه الحكايات تخيف الأهل بدرجة كبيرة
لذلك نحن نرجو من آعلامنا أن يوضح المزايا والعيوب
وأيضا الموبايل له فوائد كثيرة ولكن الأهل أيضا يعتقدون أنه وسيلة لفساد الشباب لأنه من الممكن لأى شاب أو فتاة أن يكلموا أى شخص بدون معرفة أهلهم ولكن عندى سؤال هل قبل الموبايل كانوا الشباب ملتزمين أو بمعنى أخر هل فى هذا الوقت لم نرى شباب أو فتيات يفعلوا أشياء خطأ
فالمشكلة ليست فى الموبايل المشكلة فى الشخص نفسه وأيضا يجب أن نتجه الى وسيلة الأقناع فمثلا جرب أن تترك الموبايل فى منزلك وضع الخط فى أى مكان وأذهب الى كليتك أو عملك أو الى أى مكان وتعمد أن تتأخر لترى ماذا سيحدث عند رجعوك سوف ترى أهلك فى قمة الخوف عليك ويقولون لك لماذا لما تأخذ معك الموبايل وهم هكذا أعترفوا بفائدتة وأفعل هكذا مرات عديدة حتى يقتنعوا تماما بأنه ليس خطأ
وفى النهاية النت أو الموبايل فيه المميزات والعيوب ونحن الذين نحدد هذا فلو أستخدمنا هذه الأشياء فى أتجاهات مفيدة سوف نصل الى أشياء مفيدة ولو أستخدمناها فى أتجاهات غير مفيدة
فنحن كلنا نعلم نهاية الخطأ
ولا تنسوا أن ترسلوا لنا بمشاكلكم على البريد الألكترونى
hallalmashakel@gmail.com

المهر الضخم

السلام عليكم و رحمة الله و بركاتة

بعد التحية
انا شاب عندي 26 سنة متخرج منذ 5 سنوات و اعمل كمهندس مدني في شركة متعددة الجنسيات و الحمد للة كرمني الله بالحفاظ علي الصلاة و الصوم و حافظ اجزاء كثيرة من القران الكريم و الحمد للة
اكيد طبعا انتي تتسألي أين المشكلة, المشكلة يا افندم اني عديم الخبرة في التعامل بنات و هذا و اللة العظيم كذبا كدب و لا هو محاولة لإظهار الساذجة او محاولة الادعاء لكن انا انسان عملي جداااا و كنت أعتقد اني اثناء دراستي او عملي انني لو تعرفت علي احد من الجنس اللطيف فان هذا سيؤدي الي اهمال في عملي و دراستي و هذا بالتأكيد ليس بصحيح..
المهم اني كنت مؤمن بالكلام دة جداااا لدرجة اني زميلاتي المهندسات كانوا بيحاولوا يناقشوني في الشغل بس انا كنت دايما بصدهم اعتقادا مني اني ممكن اقع في حب واحدة منهم و ان هذا سيؤدي الي اهمالي في عملي و تعطيلي عن مشاريعي الدراسية الهامة

و ظل هذا الاعتقاد راسخ في نفسي مع اني أري كل اصدقائي و اخي الطبيب الناجح في عملة ناجحون جدااا في التعامل مع الجنس اللطيف و دايما ناجحون معاهم في اطار العمل, طبعا انا كنت ضدهم تماما في هذا المنطق و لما كان أحد منهم بيحب واحدة و يروح يخطبها او يتجوزها بيكون فرحان جداااا و في قمة السعادة و في حين اني انا مش مقتنع بإني ممكن يجي يوم و اتعامل مع البنات, حياتي عبارة عن صد اي واحدة بتحاول تقرب مني حتي في نطاق العمل, مع اني انا و بشهادة كل الناس انسان مرح جداااا و صادق جداااا الا اني اصاب بحالة من العصبية اول متحاول اي بنت تتكلم معايا, قاس في التعامل مع البنات الي اقسي حد, و طبعاااا ادي ذلك اني اصبحت في عزلة عن البنات و احسست بوحدة شديدة و طبعااا جميع اصدقائي المقربين مرتبطين بالخطوبة او بالزواج و اصبحت مقابلتنا مقتصرة علي المقابلات الشهرية تنيجة لظروف السفر و العمل الليلي و النوبات الليلية, بالإضافة الي انشغال جميع اصدقائي مع خطيبتهم او ازواجهم في وقت الفراغ او الاجازات

و مرت علي فترات عصيبة من الوحدة القاتلة, و احسست امي الحبيبة الغالية بذلك و اقترحت علي امر زواجي او محاولة لدفعي بالإرتباط ثم الزواج, و صدمت يا سيدتي صدمة كبيرة, فكيف و انا لا اعرف السباحة تلقون بي في بحر عميق مع اسماك القرش!!! فانا شخص سلبي تماما مع البنات و انا لم اتعامل مطلقا مع اي بنت بخلاف اختي, فكيف تريدون مني ان اتعامل و اقدم نفسي لانسانة لا اعرفها!!! فطلبت من امي مهلة للتفكير, و استخرت ربي و توكلت علي اللة و وافقت علي طلب امي, فانطلق السباق المحموم من امي و خالاتي و عماتي و جمع "كبار" العائلة لاختيار عروس مناسبة لي, و يالة من احراج قاتل!!!كم من انسة محترمة جلست معها لاناقش والدها او احد اخواتها في المستقبل السياسي و الاقتصادي و البورصة و احوال البنوك و غيرها من المواضيع الممتعة و الاحداث الجارية, فانا نسيت ان اذكر لكي اني انسان مثقف جدااا و احمل درجة الماجستير في ادارة الاعمال المدنية و قارئ نهم لكل جرائد سواء الحزبية او القومية او المعارضة, و في اثناء هذة المناقشات اترك الانسة المحترمة بدون توجية اي اسئلة او مناقشات و هي بالطبع تنتظر مني دفعها في المشاركة, و عندما يتركني اهلها وحدنا لكي نتحدث قليلا, فاصاب بمرض الصمت القاتل و اتجاهلها تماما و تصبح ردودي مقتضبة و غير مرضية لاي انثي و لن استطيع ان اصف لكي حجم الاحراج الذي تسببت فية لاهلي و عائلتي بصمتي هذا

و في يوم من الايام طلبت من امي و عائلتي التوقف عن البحث لاني قد نلت كفايتي و لم اريد ان ازيد من الاحراج لنفسي و لهم, و لكن ابي اقترح علي ان احاول محاولة اخيرة مع احد اقاربنا المقربين و لة ابنة طالبة في السنة النهائية باحد الكليات العملية و هي انسة متدينة جدااا و علي درجة عالية من الاخلاق و الكرم, فاستمعت الي كلام والدي و ذهبت لكي اريح اهلي, و انطلاقا من المبدا ان ماحدث قبلا سوف يحدث مرة ثانية, و لكني وجدت انسانة مختلفة تماما, انسانة علي درجة عالية جدااا من الثقافة و التدين و قمة في الاخلاق و لها رأيها الخاص و لها شخصيتها المستقلة و عندما جلست معاها وحدنا جلست لاتحدث معها فوجدت انها انسانة محترمة جداااا و نجحت من اول جلسة ان تفهمني برغم انها اصغر مني في السن بحوالي 5 سنوات كاملة و وجدت نفسي معها علي درجة عالية من الانسجام و التكافؤ الفكري و العقلي, و طلبت ان اجلس معها مرة ثانية و ثالثة و رابعة و خامسة و في كل مرة كنت ازداد بها تعلقا و هي كذلك كانت دائما تقول لي اني انسان محترم جداااا و انها لن تجد افضل مني و بعد اذن من اهلها اخذت رقم هاتفها المحمول و بدات بالتحدث معها فوجدت انها انسانة طيبة جدااا و حنونة للغاية و نجحت بالاخذ بيدي و اكتشفت منذ لحظة ارتباطي بيها ان تعاملي مع الجنس اللطيف اختلف تماما و اصبح اعداء الامس هم اصدقاء اليوم و اصبحت انا المستشار لكثير من الزميلات في العمل و كاني كنت البس قناع معين و نجحت هذة الفتاة الممتازة ان تنزع عني هذا القناع فانطلقت شخصيتي المرحة اساسا و الطبيعية, و الحمد للة عشت اياما في منتهي السعادة

اذن فاين المشكلة, المشكلة يا سيدتي انني قررت الانتقال الي المرحلة التالية و هي الخطوبة الرسمية و قمت بتجهيز شقة الزوجية و اجراء كل مايلزم لجعلها سكننا محترما يليق بي و بها ثم حدثت الصدمة, طلب اهل حبيبتي مبلغا مبالغ فية كمهر و شبكة لتقديمهما للعروس و المشكلة ان هذا المبلغ كبير جدااا و بعيد تماما عن امكانياتي و قدراتي و قدرات اهلي و عندما حاولت ان افاوض اهل العروسة علي ضخامة المبلغ المطلوب تم رفض هذا الطلب نهائيا علي اساس ان هذا عرف العائلة و ان هذا اخر مبلغ تم دفعة في اخر عروس لهم في العائلة و المفترض ان يزيد الملغ لا ان يقل!!! و ليس هذا كل شئ و انما اعترضوا ايضا علي موقع الشقة و طالبوا بتغير مكانها مع ان الشقة في موقع راق جدااا و قمت بتشطيبها علي اعلي مستوي و بافضل امكانياتي, بالاضافة انهم اعتراضوا علي عملي لانني اسافر خارج محافظتي الساحلية كثيرا وطلبوا مني تغير مكان عملي لاني كثير الاسفار, "فهي هتقعد لوحدها يعني" هكذا رد والد حبيبتي!!!! فاحسست اني في سوق للسلع و اني لا اتزوج و انما اقوم بشراء زوجة لإقنتاؤها و وضعها في المنزل, فقمت بالرفض و قطعت كل علاقتي بالموضوع لاني احب عملي و الحمد للة. المشكلة الان اني احب حبيبتي و انها ايضا تبادليني نفس الاحساس و مازلنا علي علاقتنا لاننا مقتنعين ان بيننا درجة تفاهم عالية جداااا و اننا مناسبين لطبائع بعضنا البعض. فاما هو رايك يا سيدتي و ماذا علي ان افعل!!!!! المهم اني فكرت في توسيط الاقارب و كبار العيلة لتسهيل الزواج و تقريب وجهات النظر الا انهم لم يوفقوا في ذلك و وجدوا رفض قاطع و غير طبيعي!!!! برجاء النصح


أولا أنا فى بداية المشكلة ما كنتش أتخيل أنك فى النهاية علاقتك هتتحسن بالبنات وبالجنس الآخر ولكنى لما وصلت لنهاية الرسالة فرحت جدا بالتغيير ده وفرحت أكتر بأنك لاقيت نصك الثانى وأخيرا هترتبطوا ببعض
ثانيا بخصوص اللى حصل بينك وبين أهلها فى طلبات المهر والشبكة وخلافة أول حاجة كنت هقولك حاول تانى وثالث ورابع وعاشر توسيط ناس بينك وبين أهلها وكمان خليها تحاول تكلم أهلها أكيد هيا عارفة نقاط ضعفهم تجاهها وتقدر تدخل ليهم منين
ثانى حاجة لو مقدرتوش توصلوا لحل وهما مصرين ممكن مثلا تتفقوا أنكم تكتبوا فى القايمة أن المهر والشبكة بالقيمة اللى هما عايزينها ولكن أنت أمكانياتك أقل من كده وده اللى هتقدر عليه ولكن ده هيبقى حاجة شكلية وممكن ترضى أهل خطيبتك وأعتقد طالما أنتوا متفقين أنت وحبيبتك أن شاء الله مش هيحصل أى مشاكل بينكم ومفيش خوف من موضوع القايمة
ثالث حاجة لو الحل ده مش مناسب ومش هيرضيك ولا يرضيهم عليكم بقى بالصبر وبأنكم تفضلوا مصرين على رأيكم وهيا عليها الدور الأكبر طبعا فى رفض أى حد يتقدم ليها وصدقنى شوية شوية وأهلها هيلينوا وهيقتنعوا وهيغيروا رأيهم ولكن عليكم بالصبر
أخر حاجة عليكم بالدعاء لربنا داااااااااااااااااااااااااااايما لأنه هو الوحيد القادر على تيسير الأمور وعليكم بصلاه الأستخارة كتير أنت وحبيبتك وكمان صلاه الحاجة وأن شاء الله ربنا هيبين ليكم كل شىء وكل المشاكل تتحل وتكونوا لبعض
أخيرا دعواتى وتمنياتى القلبية ليكم وبأن موضوعكم يتم على كل خير وفى أنتظار أى أستفسار أو أى شىء خاص بيكم

ومستنين كل مشاكلم على
hallalmashakel@gmail.com